અમેરિકાના અલાસ્કાના 10 લોકો સાથેની બેરિંગ એરની ફ્લાઇટ અચાનક ગાયબ થઈ જતા હાહાકાર મચી ગયો છે. ગુરુવારે બપોરે આ ફ્લાઇટ છેલ્લે અલાસ્કાના નોમ નજીક જોવા મળી હતી. વિમાને અલાસ્કાના ઉનાલકલીટથી બપોરે 2:37 વાગ્યે ઉડાન ભરી હતી અને 3:16 વાગ્યે રડાર પરથી ગાયબ થઈ ગયું હતું. આ માહિતી ફ્લાઇટ ટ્રેકિંગ વેબસાઇટ ફ્લાઇટ રડાર 24ના ડેટા પરથી મેળવવામાં આવી છે. ગુમ થયેલા વિમાન સેસ્ના 208B ગ્રાન્ડ કારવાં હતું જેમાં પાઇલટ સહિત 10 લોકો સવાર હતા. મીડિયા રિપોર્ટ્સ અનુસાર, અલાસ્કા ડિપાર્ટમેન્ટ ઓફ પબ્લિક સેફ્ટીએ જણાવ્યું હતું કે પ્લેનને શોધવા માટે નોમ અને વ્હાઇટ માઉન્ટેનમાં સ્થાનિક લોકોની મદદથી જમીન પર શોધખોળ હાથ ધરવામાં આવી રહી છે. જોકે, ખરાબ હવામાનને કારણે હવાઈ શોધ કામગીરી હાલ પૂરતી અટકાવી દેવામાં આવી છે.
કેમ અલાસ્કામાં આટલા વિમાન દૂર્ઘટના થઈ રહી છે ?
સ્થાનિક અધિકારીઓના જણાવ્યા અનુસાર, નાના ટર્બોપ્રોપ સેસ્ના કારવાં વિમાનમાં નવ મુસાફરો અને એક પાયલોટ સવાર હતા. ફ્લાઇટ ટ્રેકિંગ વેબસાઇટ ફ્લાઇટ રડાર 24 એ પુષ્ટિ આપી છે કે ટીમો વિમાનના છેલ્લા સ્થાનને શોધવાનો પ્રયાસ કરી રહી છે. યુએસ સરકારના નેશનલ ઇન્સ્ટિટ્યૂટ ઓફ ઓક્યુપેશનલ સેફ્ટી એન્ડ હેલ્થ અનુસાર, અન્ય કોઈપણ યુએસ રાજ્ય કરતાં અલાસ્કામાં એર ટેક્સી અને નાના વિમાન અકસ્માતો વધુ સામાન્ય છે. કારણ કે અહીં પર્વતીય ભૂપ્રદેશ અને મુશ્કેલ હવામાન વિમાન સંચાલનને પડકારજનક બનાવે છે. અલાસ્કાના ઘણા ગામડાઓ રસ્તાઓથી જોડાયેલા નથી, જેના કારણે લોકો અને માલસામાનના પરિવહન માટે નાના વિમાનોનો ઉપયોગ કરવો પડે છે.
બેરિંગ એર અલાસ્કાની પ્રાદેશિક એરલાઇન
બેરિંગ એર અલાસ્કામાં એક પ્રાદેશિક એરલાઇન છે, જે લગભગ 39 વિમાનો અને હેલિકોપ્ટરનું સંચાલન કરે છે. આ માહિતી ફ્લાઇટ રડાર 24 ના ડેટામાં આપવામાં આવી છે. અમેરિકામાં તાજેતરના સમયમાં વિમાન અકસ્માતોની ઘટનાઓમાં વધારો થયો છે. ૧ ફેબ્રુઆરીના રોજ, ફિલાડેલ્ફિયામાં એક લિયરજેટ ૫૫ વિમાન ક્રેશ થયું હતું જેમાં છ લોકો સવાર હતા. આ અકસ્માત પછી ઘણા ઘરોમાં આગ લાગી ગઈ. વિમાન સ્પ્રિંગફીલ્ડ બ્રાન્સન રાષ્ટ્રીય વિમાનમથક તરફ જઈ રહ્યું હતું. હાલમાં, અલાસ્કામાં ગુમ થયેલા વિમાનની શોધ ચાલુ છે અને અધિકારીઓની એક ટીમ તેનું સ્થાન શોધવાનો પ્રયાસ કરી રહી છે.
