ગુજરાતમાં વસતા લોકોએ કાતિલ ઠંડી સહન કરવા માટે તૈયાર રહેવું પડશે.. કારણ કે રાજ્યમાં આગામી સમયમાં હજુ વધારે ઠંડી પડવાની આગાહી કરવામાં આવી છે. અને આગામી સમયમાં ઠંડીનું પ્રમાણ વધુ તીવ્ર બનશે. હવામાન નિષ્ણાત પરેશ ગોસ્વામીએ આગાહી કરી છે કે આ વખતે ડિસેમ્બરના અંત સુધીમાં ઠંડીના તમામ રેકોર્ડ તૂટી જશે. રાજ્યમાં છેલ્લા ચાર-પાંચ દિવસથી દિવસેને દિવસે ઠંડીનું જોર વધી રહ્યું છે. અને હજુ પણ શીતલહેરમાં રાહતના કોઈ સમાચાર નથી. ગુજરાતના જાણીતા હવામાન નિષ્ણાત અને આગાહીકાર પરેશ ગોસ્વામીએ ફરી એકવાર ઠંડી વચ્ચે કરા અને કમોસમી પડવાની આગાહી કરી છે, એટલું જ નહીં આ વખતે રાજ્યમાં રેકોર્ડબ્રેક ઠંડી પડી શકે તેવી પણ આગાહી કરવામાં આવી છે.
હવામાન નિષ્ણાત પરેશ ગોસ્વામીએ આગાહી કરતા કહ્યું છેકે, આ વખતે ડિસેમ્બરના અંતમાં ઠંડી તમામ રેકોર્ડ તોડી નાખશે અને જાન્યુઆરી મહિનામાં પણ આ જ સ્થિતિ ઠંડીની રહેશે. મહત્વનું છેકે, તીવ્ર ઠંડીનો સમયગાળો ડિસેમ્બરના અંત સુધી ચાલુ રહેશે. છેલ્લા પાંચ-છ દિવસથી ઠંડીનો ચમકારો પ્રસરી રહ્યો છે, સમગ્ર ગુજરાતમાં રાત-દિવસ તેજ પવન ફૂંકાઈ રહ્યો છે, નલિયા તેમજ અમદાવાદ અને રાજકોટ સહિતના અનેક વિસ્તારોમાં ઠંડીનો ચમકારો સતત વધી રહ્યો છે. તેમજ દક્ષિણ ગુજરાતના પણ વિવિધ જિલ્લામાં કાતિલ ઠંડી પડી રહી છે.
ભારતીય હવામાન વિભાગે શનિવારે આગાહી કરી છે કે આગામી સાત દિવસ સુધી દેશના અનેક રાજ્યોમાં કોલ્ડવેવની સ્થિતિ ચાલુ રહેશે. બંગાળની ખાડીમાં લો પ્રેશર સિસ્ટમના કારણે દક્ષિણ ભારતમાં ભારે વરસાદની સંભાવના છે. વેસ્ટર્ન ડિસ્ટર્બન્સના કારણે ઉત્તરના વિસ્તારોમાં કોલ્ડવેવ, ગાઢ ધુમ્મસ અને હિમવર્ષા થવાની શક્યતાઓ છે. ડિસેમ્બરમાં બીજી વખત વાવાઝોડાનો ખતરો તોળાઈ રહ્યો છે. અંબાલાલ પટેલે આગાહી કરી છે કે 23 ડિસેમ્બરથી કંપાવી દે તેવી ઠંડી પડશે. તેમણે જણાવ્યું હતું કે, 16થી 22 ડિસેમ્બર દરમિયાન વાદળછાયા વાતાવરણને કારણે અરબી સમુદ્રમાં લો પ્રેશર સર્જાવાની શક્યતા છે. તેમજ જમ્મુ કાશ્મીરમાં સતત બરફ પડતા દેશ ભરમાં ઠંડી પડી રહી છે. જમ્મુ કાશ્મીરની વાત કરીએ તો જમ્મુ કાશ્મીરના રસ્તાઓ હાલ બરફની ચાદરથી ઢંકાઈ ગયા છે. જ્યાં જુઓ ત્યાં બરફ પડી રહ્યો છે. લોકો ઠંડીથી બચવા માટે ગરમ કપડા અને સ્વેટરનો ઉપયોગ કરી રહ્યા છે.
