દક્ષિણ-પશ્ચિમ કોંગોમાં મંગળવારે એક મોટો અકસ્માત થયો હતો. જેમાં અંદાજે 25 લોકોનાં મોત થયાં છે. મૃતકોમાં ઘણા ફૂટબોલ ખેલાડીઓ પણ હોવાનું કહેવાય છે, જેઓ મેચ રમીને પાછા ફરી રહ્યા હતા. ત્યારે આ અકસ્માત થયો હતો. અંહી હોડી પલટી જવાથી દુર્ઘટના બની હોવાનું કહેવાય રહ્યું છે. આ ઘટના અંગે જણાવવામાં આવ્યું હતું કે ફૂટબોલ ખેલાડીઓ મેચ રમીને બોટ દ્વારા પરત ફરી રહ્યા હતા. આ સમય દરમિયાન તેઓ અકસ્માતનો ભોગ બન્યા અને 25 લોકો મૃત્યુ પામ્યા હતા. આ સમય દરમિયાન, 30 લોકો પોતાનો જીવ બચાવવામાં સફળ રહ્યા.
કેવી રીતે બન્યો અકસ્માત?
મળતા અહેવાલો અનુસાર રાત્રે બોટમાં સવાર મોટાભાગના લોકો મેચમાંથી પરત ફરી રહ્યા હતા. આ દરમિયાન નદીમાં બોટ પલટી ગઈ હતી. પ્રાંતીય પ્રવક્તા એલેક્સિસ મ્પુટુએ જણાવ્યું હતું કે રાત્રે ઓછી દૃશ્યતા અકસ્માતનું કારણ બની શકે છે. દરમિયાન, મુશી વિસ્તારના સ્થાનિક પ્રશાસક રેનેકલ ક્વાટીબાના જણાવ્યા અનુસાર, આ અકસ્માતમાં ઓછામાં ઓછા 30 અન્ય લોકોને બચાવી લેવામાં આવ્યા છે. છતાં, 25 લોકોએ જીવ ગુમાવ્યા. ઉલ્લેખનીય છે કે આ મધ્ય આફ્રિકન દેશમાં આવા બોટ અકસ્માતો ખૂબ જ સામાન્ય છે. રાત્રે મુસાફરી કરવા અને ક્ષમતા કરતા વધુ મુસાફરોને લઈ જવાને કારણે આવા અકસ્માતો વારંવાર થાય છે.
કેમ બને આવી ઘટનાઓ?
હકીકતમાં, અહીં રસ્તાઓના અભાવને કારણે, નદીઓ લોકો માટે પરિવહનનું મુખ્ય સાધન છે. ૧૦ કરોડથી વધુ લોકો નદીઓ પર ખૂબ નિર્ભર છે. સમયાંતરે અહીં દુ:ખદ અકસ્માતોના સમાચાર આવતા રહે છે. છેલ્લા કેટલાક વર્ષોમાં આવા બોટ અકસ્માતોમાં સેંકડો લોકોના મોત થયા છે. જો આપણે તાજેતરની કેટલીક ઘટનાઓ પર નજર કરીએ તો, ડિસેમ્બર 2024 માં પણ આવા બે અકસ્માતો સામે આવ્યા હતા. કોંગોની બુસિરા નદીમાં એક પેસેન્જર બોટ પલટી જતાં 38 લોકોના મોત થયા હતા. આના ચાર દિવસ પહેલા જ બીજી બોટ ડૂબવાથી 25 લોકોના મોત થયા હતા. તે જ સમયે, ઓક્ટોબરમાં, કોંગોના કિવુ તળાવમાં એક બોટ પલટી જતાં ઓછામાં ઓછા 78 લોકોનાં મોત થયાં હતાં
