ચેમ્પિયન્સ ટ્રોફી 2025માં ટીમ ઈન્ડિયાના શાનદાર પ્રદર્શન બાદ ચાહકો થોડા નિરાશ છે. આ નિરાશા પાછળનું કારણ એ છે કે ભારતીય સ્ટાર્સ હાલમાં ક્રિકેટ એક્શનથી દૂર છે. જો કે, ચાહકોની રાહ ટૂંક સમયમાં સમાપ્ત થવા જઈ રહી છે. 22મી માર્ચથી ‘ક્રિકેટ ફેસ્ટિવલ’ શરૂ થવા જઈ રહ્યો છે. હા, અમે IPL 2025ની વાત કરી રહ્યા છીએ, જેમાં માત્ર ટીમ ઈન્ડિયા જ નહીં પરંતુ દુનિયાભરના સ્ટાર ખેલાડીઓ ધૂમ મચાવવાના છે.
IPL 2025ની શરૂઆત ડિફેન્ડિંગ ચેમ્પિયન કોલકાતા નાઈટ રાઈડર્સ વિ રોયલ ચેલેન્જર્સ બેંગ્લોર (KKR vs RCB) વચ્ચેની મેચથી થશે. આ શાનદાર મેચ 22 માર્ચે ઐતિહાસિક ઈડન ગાર્ડન મેદાન પર રમાશે. તેના એક દિવસ બાદ IPLની અલ ક્લાસિકોમાં ચેન્નાઈ સુપર કિંગ્સનો સામનો મુંબઈ ઈન્ડિયન્સ સામે થશે. એક તરફ એમએસ ધોની, રુતુરાજ ગાયકવાડ, રવીન્દ્ર જાડેજા અને રવિચંદ્રન અશ્વિન જેવા ખેલાડીઓ હશે, જ્યારે તાજેતરમાં ચેમ્પિયન્સ ટ્રોફી જીતીને પરત ફરેલો રોહિત શર્મા પણ તેમની સાથે ટક્કર આપવા માટે તૈયાર હશે. જો કે, આ મોટી મેચ પહેલા મુંબઈ ઈન્ડિયન્સના કેમ્પમાં ચોક્કસ ટેન્શન છે.
IPLની પ્રથમ મેચ હાર્દિક નહીં રમે
ટીમ ઈન્ડિયાનો શાનદાર ઓલરાઉન્ડર અને મુંબઈ ઈન્ડિયન્સનો કેપ્ટન હાર્દિક પંડ્યા IPL 2025ની પ્રથમ મેચ રમી શકશે નહીં. હવે તમે વિચારી રહ્યા હશો કે હાર્દિકે હમણાં જ ચેમ્પિયન્સ ટ્રોફી રમી છે અને તેને ઈજા નથી તો તે ચેન્નાઈ સુપર કિંગ્સ સામેની મોટી મેચમાં કેમ ઉપલબ્ધ નહીં હોય. તેની પાછળની કહાની પાછલી સિઝન સાથે જોડાયેલી છે.
હાર્દિક પંડ્યા પર લાગ્યો પ્રતિબંધ
હાર્દિક પંડ્યા પર IPLમાં એક મેચનો પ્રતિબંધ મૂકવામાં આવ્યો છે. IPL 2024 દરમિયાન, મુંબઈ ઈન્ડિયન્સ લખનૌ સુપર જાયન્ટ્સ સામેની મેચમાં સિઝનમાં ત્રીજી વખત ધીમી ઓવર રેટ માટે દોષી સાબિત થઈ હતી. તે સિઝનમાં મુંબઈ ઈન્ડિયન્સની છેલ્લી મેચ સાબિત થઈ હતી. MIના કેપ્ટન હાર્દિક પંડ્યા પર ધીમી ઓવર રેટ માટે એક મેચ માટે પ્રતિબંધ મૂકવામાં આવ્યો હતો, જે આ સિઝનની પ્રથમ મેચ એટલે કે મુંબઈ ઈન્ડિયન્સ વિ ચેન્નાઈ સુપર કિંગ્સ મેચ દરમિયાન લાગુ થશે.
રોહિત શર્મા કરશે સુકાની?
IPL 2024 મુંબઈ ઈન્ડિયન્સ માટે સારું રહ્યું ન હતું. રોહિતની જગ્યાએ હાર્દિકને કેપ્ટન બનાવવા ફ્રેન્ચાઇઝીએ મોટો નિર્ણય લીધો છે. ચાહકોને આ નિર્ણય બિલકુલ પસંદ ન આવ્યો અને સમગ્ર ટૂર્નામેન્ટ દરમિયાન ઓલરાઉન્ડરને ભારે ટ્રોલ કરવામાં આવ્યો. મુંબઈ ઈન્ડિયન્સનું પ્રદર્શન પણ નિરાશાજનક રહ્યું હતું અને ટીમ પ્લેઓફ માટે પણ ક્વોલિફાઈ થઈ શકી નહોતી. હવે સવાલ એ છે કે હાર્દિક પંડ્યાની ગેરહાજરીમાં ચેન્નાઈ સુપર કિંગ્સ સામેની મેચમાં મુંબઈ ઈન્ડિયન્સની કેપ્ટનશીપ કોણ કરશે? ફાસ્ટ બોલર જસપ્રિત બુમરાહ પણ હજુ સુધી ઈજામાંથી બહાર આવ્યો નથી અને તે કેટલીક મેચો પણ ચૂકી જશે. આવી સ્થિતિમાં, ફ્રેન્ચાઇઝી ફરીથી રોહિત પાસે જઈ શકે છે.
