છત્તીસગઢના ભૂતપૂર્વ મુખ્યમંત્રી ભૂપેશ બઘેલના નિવાસસ્થાનેથી મોટી રકમ રોકડ મળી આવ્યાના આરોપો વચ્ચે એન્ફોર્સમેન્ટ ડિરેક્ટોરેટએ એક મોટું પગલું ભર્યું છે. EDના અધિકારીઓ રોકડ ગણતરી માટે બે રોકડ ગણતરી મશીન લાવ્યા છે. EDએ ભૂપેશ બઘેલના પુત્ર ચૈતન્ય બઘેલ સાથે જોડાયેલા એક પરિસરમાંથી કેટલાક ઇલેક્ટ્રોનિક ગેજેટ્સ અને દસ્તાવેજો પણ જપ્ત કર્યા છે. મળતી માહિતી અનુસાર ચૈતન્ય બઘેલને ટૂંક સમયમાં પૂછપરછ માટે બોલાવવામાં આવશે. એવી શક્યતાઓ છે પૂછપરછનો પહેલો રાઉન્ડ મંગળવારથી શરૂ થઈ શકે છે. EDના દરોડા અને કાર્યવાહીમાં ચૈતન્ય બઘેલ વિરુદ્ધ મળેલા પુરાવાના આધારે કરવામાં આવી છે. જેમાં 2100 કરોડ રૂપિયાના દારૂ કૌભાંડમાં મુખ્ય ખેલાડીઓમાંના એક તરીકે તેનું નામ સામેલ છે.
બઘેલના પરિસરમાં 14 સ્થળે ઈડીના દરોડા
છત્તીસગઢ દારૂ કૌભાંડની તપાસ ઝડપી બનાવવા માટે, ED એ સોમવારે રાજ્યમાં ચૈતન્ય બઘેલના પરિસર સહિત 14 અન્ય સ્થળોએ દરોડા પાડ્યા હતા. આ કાર્યવાહી 2019 થી 2022 દરમિયાન રાજ્યમાં થયેલા લગભગ 2,161 કરોડ રૂપિયાના કૌભાંડ સાથે સંબંધિત છે. તપાસ દરમિયાન, મીડિયા રિપોર્ટ્સમાં EDના સૂત્રોને ટાંકીને કહેવામાં આવ્યું હતું કે, અમને કેટલાક પુરાવા મળ્યા છે જે ચૈતન્ય બઘેલ સાથે જોડાયેલા છે. અમે હાલના પુરાવાના આધારે આ દરોડા પાડી રહ્યા છીએ.આજે સવારે ભૂપેશ બઘેલના પુત્ર ચૈતન્ય બઘેલ પર EDએ દરોડા પાડવાનું શરૂ કર્યું.
ભૂપેશ બઘેલે તેમના સમર્થકોનો આભાર માન્યો
છત્તીસગઢના ભૂતપૂર્વ સીએમ ભૂપેશ બઘેલ દુર્ગ સ્થિત તેમના નિવાસસ્થાન પર EDના દરોડા પછી તેમના સમર્થકોને સંબોધિત કરી રહ્યા છે. તેમણે કહ્યું કે આ સંકટની ઘડીમાં તમારે મજબૂતીથી ઊભા રહેવું જોઈએ. હું હાથ જોડીને તમારો આભાર વ્યક્ત કરું છું. EDની તપાસ પર ભૂપેશ બઘેલે કહ્યું કે કોઈમાં મને સ્પર્શ કરવાની હિંમત નથી.
