તુર્કી અને સીરિયામાં આવેલા ભૂકંપમાં અત્યાર સુધીમાં 15,000થી વધુ લોકોના મોત થયા છે. રાહત અને બચાવ કાર્ય હજુ પણ ચાલુ છે અને મૃત્યુઆંક હજુ વધવાની આશંકા છે. તુર્કીના રાષ્ટ્રપતિ રેસેપ તૈયપ એર્દોગને દેશમાં સાત દિવસના શોકની જાહેરાત કરી છે. અમેરિકા, ભારત સહિત ઘણા દેશોએ તુર્કીની મદદ માટે ટીમ મોકલી છે. એક તરફ જ્યાં લોકો સોશિયલ મીડિયા પર આ દુર્ઘટના પર શોક વ્યક્ત કરી રહ્યા છે, તો બીજી તરફ એક વર્ગ એવો છે જે આ ભૂકંપને લઈને ષડયંત્રની થિયરી પર ચર્ચા કરી રહ્યો છે. આવા લોકોનું કહેવું છે કે આ ભૂકંપ તુર્કીને સજા આપવાનું અમેરિકાનું કાવતરું છે.
સોશિયલ મીડિયા પર લોકોનો એક વર્ગ કહી રહ્યો છે કે આ ભૂકંપ અમેરિકાએ તેના અત્યંત આધુનિક ટેકનોલોજી પ્રોજેક્ટ HAARPનો ઉપયોગ કરીને બનાવ્યો છે. ભૂકંપ સમયે વીજળી પડવાના કેટલાક વીડિયો સોશિયલ મીડિયા પર પોસ્ટ કરવામાં આવી રહ્યા છે જેમાં દાવો કરવામાં આવી રહ્યો છે કે ભૂકંપ કૃત્રિમ રીતે બનાવવામાં આવ્યો હતો. કેટલાક યુઝર્સ કહી રહ્યા છે કે ભૂકંપમાં વીજળી પડવી એ સામાન્ય ઘટના નથી.
લોકો લખી રહ્યા છે કે આ ભૂકંપ પાછળ અમેરિકાની ટેક્નોલોજી HAARP છે. HAARP (હાઇ-ફ્રિકવન્સી એક્ટિવ ઓરોરલ રિસર્ચ પ્રોગ્રામ) એ આયનોસ્ફિયરના અભ્યાસ માટે સ્થાપિત યુએસ સંશોધન કેન્દ્ર છે.
યૂઝર્સ સોશિયલ મીડિયા પર લખી રહ્યા છે કે તુર્કીએ પશ્ચિમી દેશોના બતાવેલા માર્ગ પર ચાલવાની ના પાડી છે, જેના કારણે અમેરિકાએ તેને આ સજા આપી છે. કુરાન સળગાવવાની ઘટનાઓને જોતા તુર્કીએ સ્વીડન માટે નાટોમાં સામેલ થવાનો રસ્તો બંધ કરી દીધો હતો. આ અંગે લોકો કહી રહ્યા છે કે તુર્કીને આની સજા આપવામાં આવી છે.