ગુજરાત વિધાનસભાની ચૂંટણીના પ્રથમ તબક્કા માટે ફર્સ્ટ ડિસેમ્બરે મતદાન થવાનું છે. આવી સ્થિતિમાં મંગળવારે સાંજે 5 વાગ્યે ચૂંટણી પ્રચારનો અંત આવ્યો હતો. દક્ષિણ ગુજરાત અને કચ્છ-સૌરાષ્ટ્રના 19 જિલ્લાની 89 બેઠકો માટે 788 ઉમેદવારો મેદાનમાં છે. અહીં ગુરુવારે મતદાન થશે. ગુજરાતમાં પરંપરાગત રીતે સત્તાધારી ભારતીય જનતા પાર્ટી અને કોંગ્રેસ વચ્ચે સ્પર્ધા રહી છે, પરંતુ આ વખતે અરવિંદ કેજરીવાલની આમ આદમી પાર્ટીના રૂપમાં ત્રીજો પક્ષ મેદાનમાં છે, જેણે વિધાનસભામાં 181 બેઠકો પર પોતાના ઉમેદવારો ઉભા રાખ્યા છે. ઉલ્લેખનીય છે કે, બીજા તબક્કાનું મતદાન 5 ડિસેમ્બરે થશે અને 8મી ડિસેમ્બરે હિમાચલ પ્રદેશની સાથે જ ગુજરાત ચૂંટણીનું પણ પરિણામ જાહેર થઈ જશે.
પ્રથમ તબક્કાના કુલ 788 ઉમેદવારો
ભાજપ અને કોંગ્રેસના 89-89 ઉમેદવારો અને AAPના 88 ઉમેદવારો મેદાનમાં છે. સુરત (પૂર્વ) બેઠક પરથી AAPના ઉમેદવારે છેલ્લા દિવસે પોતાનું નામાંકન પાછું ખેંચ્યું હતું. પ્રથમ તબક્કામાં ભાજપે નવ મહિલા, કોંગ્રેસે છ અને AAPએ પાંચ મહિલા ઉમેદવારોને મેદાનમાં ઉતાર્યા છે. પ્રથમ તબક્કાના કુલ 788 ઉમેદવારોમાંથી 718 પુરુષ અને માત્ર 70 મહિલા ઉમેદવારો છે. જેમાં કુલ 70 પક્ષોના ઉમેદવારો પણ સામેલ છે.
